Claudianus fescennini de nuptiis Honorii 2

Altre sezioni


Age cuncta nuptiali

Redimita uere tellus

Celebra toros eriles;

Omne nemus cum fluuiis, omne canat profundum

5

Ligures fauete campi,

Veneti fauete montes,

Subitisque se rosetis

Vestiat Alpinus apex et rubeant pruinae.

Athesis strepat choreis

10

Calamisque flexuosus

Leue Mincius susurret

Et Padus electriferis admoduletur alnis;

Epulisque iam repleto

Resonet Quirite Thybris

15

Dominique laeta uotis

Aurea septemgeminas Roma coronet arces.

Procul audiant Hiberi,

Fluit unde semen aulae,

Vbi plena laurearum

20

Imperio feta domus uix numerat triumphos.

Habet hinc patrem maritus,

Habet hinc puella matrem

Geminaque parte ductum

Caesareum flumineo stemma recurrit ortu.

25

Decorent uirecta Baetim,

Tagus intumescat auro

Generisque procreator

Sub uitreis Oceanus luxurietur antris.

Oriensque regna fratrum

30

Simul Occidensque plaudat;

Placide iocentur urbes,

Quaeque nouo quaeque nitent deficiente Phoebo.

Aquiloniae procellae,

Rabidi tacete Cauri,

35

Taceat sonorus Auster.

Solus ouantem Zephyrus perdominetur annum.