Ausonius Theoni

Ausonius "salue" caro mihi dico Theoni,

     Versibus expediens quod uolo quodque queror.

Tertia fissipedes renouauit Luna iuuencas,

      Vt fugitas nostram, dulcis amice, domum.

5

Nonaginta dies sine te, carissime, traxi;

      Huc adde aestiuos: hoc mihi paene duplum est.

Vis nouies denos dicam deciesue nouenos

      Isse dies? anni portio quarta abiit.

Sexaginta horas super et duo milia centum

10

      Te sine consumpsi, quo sine et hora grauis.

Milia bis nongenta iubet dimensio legum

     Annumerata reos per tot obire dies:

Iam potui Romam pedes ire pedesque reuerti

      Ex quo te dirimunt milia pauca mihi.

15

Scirpea Dumnotoni tanti est habitatio uati?

     Pauliacos tanti non mihi uilla foret.

An quia per tabulam †medica pugna notatam†

      Debita summa mihi est, ne repetamus, abes?

Bis septem rutilos, regale nomisma, Philippos,

20

      Ne tanti fuerint, perdere malo, Theon,

Implicitum quam te nostris interne medullis

      Defore tam longi temporis in spatio.

Ergo aut praedictos iam nunc rescribe Darios

      Et redime, ut mora sit libera desidiae,

25

Aut alios a me totidem dabo, dummodo cari

      Conspicer ora uiri, pauperis usque licet.

Puppe citus propera sinuosaque lintea ueli

      Pande; Medullini te feret aura noti

Expositum subter paradas lectoque iacentem,

30

      Corporis ut tanti non moueatur onus.

Vnus Dumnotoni te litore perferet aestus

      Condatem ad portum, si modo deproperes,

Inque uicem ueli, quotiens tua flamina cessant,

      Remipedem iubeas protinus ire ratem.

35

Inuenies praesto subiuncta petorrita mulis;

      Villa Lucani- mox potieris -aco.

Rescisso disces componere nomine uersum;

     Lucili uatis sic imitator eris.