Acilio Glabrioni grammatico iun. Burdigalensi
Doctrinae uitaeque pari breuitate caducum,
Glabrio, te maestis commemorabo elegis,
Stemmate nobilium deductum nomen auorum,
Glabrio †Aquilini† Dardana progenies.
5
Tu quondam puero compar mihi, discipulus mox,
Meque dehinc facto rhetore grammaticus,
Inque foro tutela reis et cultor in agris,
Digna diu partis qui fruerere bonis;
Commode laete benigne abstemie, tam bone dandis
10
Semper consiliis quam taciturne datis,
Tam decus omne tuis quam mox dolor, omnia acerbo
Funere praereptus, Glabrio, destituis,
Vxore et natis, genitore et matre relictis,
Eheu, quam multis perdite nominibus!
15
Flete diu nobis, numquam satis, accipe acerbum,
Glabrio in aeternum commemorate, uale.
Acilio Scaliger
Atilio V
codex unicus
V = Leiden, Bibliotheek der Rijksuniversiteit, VLF 111 (saec. IX)
carmina 16-22 in V, folio 12 abrepto, desunt; editiones antiquiores (Charpin, Vinet, Scaliger) codicum instar habendae sunt. Tantum carmina 20,7-14 et 25,7-10 extant in v = Wien, Österreichische Nationalbibliothek, lat. 3261 (saec. XVI) et s = Leiden, Bibliotheek der Rijksuniversiteit, Opera 754 F 9