Paulinus et Dryadia filii Paulini et Megentirae sororis filiae
Qui nomen uultumque patris, Pauline, gerebas,
Amissi specimen qui genitoris eras,
Propter quem luctus miserae decedere matris
Coeperat, offerret cum tua forma patrem,
5
Redderet et mores et moribus adderet illud,
Paulinus caruit quo pater, eloquium,
Eriperis laetis et pubescentibus annis
Crudaque adhuc matris pectora sollicitas.
Flemus enim raptam thalami de sede sororem,
10
Heu non maturo funere, Dryadiam:
Flemus, ego in primis, qui matris auunculus ac uos
Natorum tamquam diligo progeniem.
Illa manus inter genetricis et oscula patris
Occidit, Hispana tu regione procul.
15
Quam tener et primo, noue flos, decerperis aeuo,
Nondum purpureas cinctus ephebe genas!
Quattuor ediderat nunc facta puerpera partus:
Funera sed tumulis iam geminata dedit.
Sit satis hoc, Pauline pater: diuisio facta est.
20
Debetur matri cetera progenies.
filiae Scaliger
filia V
codex unicus
V = Leiden, Bibliotheek der Rijksuniversiteit, VLF 111 (saec. IX)