Puer, eia, surge et calceos
Et linteam da sindonem;
Da, quicquid est, amictui
Quod iam parasti, ut prodeam;
5
Da rore fontano abluam
Manus et os et lumina.
Pateatque fac sacrarium
Nullo paratu extrinsecus:
Pia uerba, uota innoxia
10
Rei diuinae copia est.
Nec tus cremandum postulo
Nec liba crusti mellei,
Foculumque uiui caespitis
Vanis relinquo altaribus.
15
Deus precandus est mihi
Ac filius summi dei,
Maiestas unius modi,
Sociata sacro spiritu -
Et ecce iam uota ordior
20
Et cogitatio numinis
Praesentiam sentit pauens.