Ambrosius Mediolanensis hymni 11

Altre sezioni


Victor, Nabor, Felix,

Mediolani martyres,

Solo hospites, Mauri genus,

Terrisque nostris aduenae.

5

Torrens harena quos dedit,

Anhela solis aestubus,

Extrema terrae finium,

Exsulque nostri nominis,

Suscepit hospites Padus

10

Mercede magna sanguinis:

Sancto repleuit Spiritu

Almae fides ecclesiae;

Et se coronauit trium

Cruore sacro martyrum,

15

Castrisque raptos impiis

Christo sacrauit milites.

Profecit ad fidem labor,

Armisque docti bellicis

Pro rege uitam ponere,

20

Decere pro Christo pati,

Non tela quaerunt ferrea,

Non arma Christi milites.

Munitus armis ambulat,

Veram fidem qui possidet.

25

Scutum uiro sua est fides

Et mors triumphus, quem inuidens

Nobis tyrannus ad oppidum

Laudense misit martyres.

Sed reddiderunt hostias

30

Rapti quadrigis corpora,

Reuecti in ora principum

Plaustri triumphalis modo.