Hic est dies uerus Dei
Sancto serenus lumine,
Quo diluit sanguis sacer
Probrosa mundi crimina;
5
Fidem refundens perditis
Caecosque uisu inluminans.
Quem non graui soluit metu
Latronis absolutio?
Qui praemium mutans cruce
10
Iesum breui adquisit fide
Iustosque praeuio gradu
Praeuenit in regno Dei.
Opus stupent et angeli
Poenam uidentes corporis
15
Christoque adhaerentem reum
Vitam beatam carpere.
Mysterium mirabile!
Vt abluat mundi luem.
Peccata tollat omnium
20
Carnis uitia mundans caro!
Quid hoc potest sublimius,
Vt culpa quaerat gratiam
Metumque soluat caritas
Reddatque mors uitam nouam,
25
Hamum sibi mors deuoret
Suisque se nodis liget,
Moriatur ut uita omnium,
Resurgat ut uita omnium;
Cum mors per omnes transeat,
30
Omnes resurgant mortui,
Consumpta mors ictu suo
Perisse se solam gemat?