Ambrosius Mediolanensis hymni 8

Altre sezioni


Inluminans altissimus

Micantium astrorum globos,

Pax, uita, lumen, ueritas,

Iesu, faue precantibus;

5

Seu mystico baptismate

Fluenta Iordanis retro

Conuersa quondam tertio

Praesente sacraris die;

Seu stella partum uirginis

10

Caelo micans signauerit,

Et hoc adoratum die

Praesepe magos duxerit;

Vel hydriis plenis aquae

Vini saporem infuderis;

15

Hausit minister conscius,

Quod ipse non impleuerat.

Aquas colorari uidens,

Inebriare flumina,

Elementa mutata stupet

20

Transire in usus alteros.

Sic quinque milibus uirum

Dum quinque panes diuidis,

Edentium sub dentibus

In ore crescebat cibus.

25

Multiplicabatur magis

Dispendio panis suo.

Quis haec uidens mirabitur

Iuges meatus fontium?

Inter manus frangentium

30

Panis rigatur profluus;

Intacta quae non fregerant

Fragmenta subrepunt uiris.