Ambrosius Mediolanensis hymni 2

Altre sezioni


Aeterne rerum conditor,

Noctem diemque qui regis,

Et temporum das tempora,

Vt alleues fastidium;

5

Praeco diei iam sonat,

Noctis profundae peruigil,

Nocturna lux uiantibus,

A nocte noctem segregans.

Hoc excitatus lucifer

10

Soluit polum caligine,

Hoc omnis errorum chorus

Vias nocendi deserit.

Hoc nauta uires colligit,

Pontique mitescunt freta;

15

Hoc ipse petra ecclesiae

Canente culpam diluit.

Surgamus ergo strenue:

Gallus iacentes excitat

Et somnolentos increpat;

20

Gallus negantes arguit.

Gallo canente spes redit,

Aegris salus refunditur,

Mucro latronis conditur,

Lapsis fides reuertitur.

25

Iesu, labantes respice,

Et nos uidendo corrige;

Si respicis lapsus cadunt,

Fletuque culpa soluitur.

Tu lux refulge sensibus,

30

Mentisque somnum discute;

Te nostra uox primum sonet,

Et uota soluamus tibi.