Hymnum dicat turba fratrum, hymnum cantus personet,

Christo regi concinnantes laudes demus debitas.

Tu Dei de corde Verbum, tu uia, tu ueritas,

Iesse uirga tu uocaris, te leonem legimus.

5

Dextra Patris, mons et agnus, angularis tu lapis.

Sponsus idem, el, columba, flamma, pastor, ianua.

In prophetis inueniris, nostro natus saeculo.

Ante saecla tu fuisti factor primi saeculi,

Factor caeli, terrae factor, congregator tu maris,

10

Omniumque tu creator, quae Pater nasci iubet,

Virginis receptus membris Gabrihelis nuntio.

Crescit aluus prole sancta; nos monemur credere

Rem nouam nec ante uisam, uirginem puerperam.

Tunc magi stellam secuti primi adorant paruulum,

15

Offerentes tus et aurum, digna regi munera.

Mox Herodi nuntiatum inuidens potentiae.

Tum iubet paruos necari, turbam facit martyrum.

Fertur infans occulendus, Nili flumen quo fluit,

Qui refertur post Herodem nutriendus Nazareth.

20

Multa paruus, multa adultus signa fecit caelitus,

Quae latent et quae leguntur, coram multis testibus.

Praedicans caeleste regnum dicta factis adprobat.

Debiles facit uigere, caecos luce inluminat,

Verbis purgat leprae morbum, mortuos resuscitat.

25

Vinum quod deerat hydriis mutari aquam iubet,

Nuptiis mero retentis propinando populo.

Pane quino, pisce bino quinque pascit milia,

Et refert fragmenta cenae ter quaternis corbibus.

Turba ex omni discumbente iugem laudem pertulit.

30

Duodecim uiros probauit, per quos uita discitur,

Ex quis unus inuenitur Christi Iudas traditor.

Instruuntur missi ab Anna proditoris osculo.

Innocens captus tenetur nec repugnans ducitur,

Sistitur, falsis grassatur offerendus Pontio.

35

Discutit obiecta praeses, nullum crimen inuenit.

Sed cum turbae Iudaeorum pro salute Caesaris

Dicerent Christum necandum, turbis sanctus traditur.

Impiis uerbis grassatur; sputa, flagra sustinet.

Scandere crucem iubetur, innocens pro noxiis.

40

Morte carnis quam gerebat mortem uicit omnium.

Tum Deum clamore magno Patrem pendens inuocat.

Mors secuta membra Christi laxat, stricta uincula.

Vela templum scissa pandunt, nox obscurat saeculum.

Excitantur de sepulcris dudum clausa corpora.

45

Adfuit Ioseph beatus; corpus myrra perlitum,

Linteo rudi ligatum cum dolore condidit.

Milites seruare corpus Annas princeps praecipit,

Vt uideret si probaret Christus quod spoponderat.

Angelum Dei trementes ueste amictum candida,

50

Qui candore claritatis uellus uicit sericum,

Demouet saxum sepulcro, surgens Christus integer.

Haec uidet Iudaea, mendax haec negat cum uiderit.

Feminae primum monentur saluatorem uiuere,

Quas salutat ipse maestas, conplet tristes gaudio,

55

Seque a mortuis paterna suscitatum dextera

Tertia die redisse nuntiat apostolis.

Mox uidetur a beatis quos probauit fratribus.

Quod redisset ambigentes intrat clausis ianuis.

Dat docens praecepta legis, dat diuinum spiritum,

60

Spiritum Dei, perfectae Trinitatis uinculum.

Praecipit totum per orbem baptizare credulos,

Nomen Patris inuocantes, confitentes Filium,

(Mysticam fidem reuelat) unctos sancto Spiritu,

Fonte tinctos, innouatos, filios factos Dei.

65

Ante lucem turba fratrum concinnemus gloriam,

Qua docemur nos futuros sempiterno saeculo,

Nos cantantes et precantes quae futura credimus,

Inmensamque maiestatem concinnemus uniter.

Ante lucem nuntiemus Christum regem saeculo.

70

Galli cantus, galli plausus proximum sentit diem.

Ante lucem decantantes Christum regem dominum.

Qui in illum recte credunt regnaturi cum eo.

Gloria Patri ingenito, gloria Vnigenito,

Vna cum sancto Spiritu in sempiterna saecula.