Ales, dum madida grauata nube
Vdos tardius explicat uolatus,
Decepta in medio repente nisu
Capta est pondere depremente plumae:
5
Cassato solito uigore pennae,
Quae uitam dederant, dedere letum;
Sic, quis ardua nunc tenebat alis,
Isdem protinus incidit ruinae.
Quid sublimia circuisse prodest?
10
Qui celsi steterant, iacent sub imis!
Exemplum capiant, nimis petendo
Qui uentis tumidi uolant secundis.