1.
Meretricem Athenis Ephesum miles auehit.
Id dum ero amanti seruos nuntiare uolt
Legato peregre, ipsus captust in mari
Et eidem illi militi dono datust.
5
Suom arcessit erum Athenis et forat
Geminis communem clam parietem in aedibus,
Licere ut quiret conuenire amantibus.
Obhaerentis custos hos uidet de tegulis,
Ridiculis autem, quasi sit alia, luditur.
10
Itemque impellit militem Palaestrio
Omissam faciat concubinam, quando ei
Senis uicini cupiat uxor nubere.
Vltro abeat orat, donat multa. Ipse in domo
Senis prehensus poenas pro moecho luit.
2.
Meretricem ingenuam deperibat mutuo
Atheniensis iuuenis; Naupactum is domo
Legatus abiit. Miles in eandem incidit,
Deportat Ephesum inuitam. Seruos Attici,
5
Vt nuntiaret domino factum, nauigat;
Capitur, donatur illi captus militi.
Ad erum ut ueniret Ephesum scribit. Aduolat
Adulescens atque in proximo deuortitur
Apud hospitem paternum. Medium parietem
10
Perfodit seruos commeatus clanculum
Qua foret amantum. Geminam fingit mulieris
Sororem adesse. Mox ei dominus aedium
Suam clientam sollicitandum ad militem
Subornat. Capitur ille, sperat nuptias,
15
Dimittit concubinam et moechus uapulat.