Mercator Siculus, quoi erant gemini filii,
Ei surrupto altero mors optigit.
Nomen surreptici illi indit qui domist
Auos paternus, facit Menaechmum e Sosicle.
5
Et is germanum, postquam adoleuit, quaeritat
Circum omnis oras. Post Epidamnum deuenit:
Hic fuerat alitus ille surrepticius.
Menaechmum omnes ciuem credunt aduenam
Eumque appellant meretrix, uxor et socer.
10
I se cognoscunt fratres postremo inuicem.