Sulpicius Apollinaris Phormio, periocha


Chremetis frater aberat peregre Demipho

Relicto Athenis Antiphone filio.

Chremes clam habebat Lemni uxorem et filiam,

Athenis aliam coniugem et amantem unice

5

Fidicinam gnatum. Mater e Lemno aduenit

Athenas; moritur; uirgo sola (aberat Chremes)

Funus procurat. Ibi eam uisam Antipho

Cum amaret, opera parasiti uxorem accipit.

Pater et Chremes reuersi fremere. Dein minas

10

Triginta dant parasito, ut illam coniugem

Haberet ipse: argento hoc emitur fidicina.

Vxorem retinet Antipho a patruo adgnitam.