Scribebamus epos; coepisti scribere: cessi,
Aemula ne starent carmina nostra tuis.
Transtulit ad tragicos se nostra Thalia cothurnos:
Aptasti longum tu quoque syrma tibi.
5
Fila lyrae moui Calabris exculta Camenis:
Plectra, rapis nobis, ambitiose, noua.
Audemus saturas: Lucilius esse laboras.
Ludo leuis elegos: tu quoque ludis idem.
Quid minus esse potest? epigrammata fingere coepi:
10
Hinc etiam petitur iam mea palma tibi.
Elige quid nolis- quis enim pudor omnia uelle?-
Et si quid non uis, Tucca, relinque mihi.