Sunt chartae mihi quas Catonis uxor
Et quas horribiles legant Sabinae:
Hic totus uolo rideat libellus
Et sit nequior omnibus libellis.
5
Qui uino madeat nec erubescat
Pingui sordidus esse Cosmiano,
Ludat cum pueris, amet puellas,
Nec per circuitus loquatur illam,
Ex qua nascimur, omnium parentem,
10
Quam sanctus Numa mentulam uocabat.
Versus hos tamen esse tu memento
Saturnalicios, Apollinaris:
Mores non habet hic meos libellus.