Martialis epigrammata 10, 70

Altre sezioni


Quod mihi uix unus toto liber exeat anno

      Desidiae tibi sum, docte Potite, reus.

Iustius at quanto mirere quod exeat unus,

      Labantur toti cum mihi saepe dies.

5

Non resalutantis uideo nocturnus amicos,

      Gratulor et multis; nemo, Potite, mihi.

Nunc ad luciferam signat mea gemma Dianam,

      Nunc me prima sibi, nunc sibi quinta rapit.

Nunc consul praetorue tenet reducesque choreae,

10

      Auditur toto saepe poeta die.

Sed nec causidico possis impune negare,

      Nec si te rhetor grammaticusue rogent:

Balnea post decumam lasso centumque petuntur

      Quadrantes. fiet quando, Potite, liber?