Simplicior priscis, Munati Galle, Sabinis,
Cecropium superas qui bonitate senem,
Sic tibi consoceri claros retinere penates
Perpetua natae det face casta Venus:
5
Vt tu, si uiridi tinctos aerugine uersus
Forte malus liuor dixerit esse meos,
Vt facis, a nobis abigas, nec scribere quemquam
Talia contendas carmina qui legitur.
Hunc seruare modum nostri nouere libelli,
10
Parcere personis, dicere de uitiis.