Martialis epigrammata 9, 59

Testo base di riferimento: W. M. Lindsay, 1929

Cura dell'edizione digitale: A. Fusi, 2010

Altre sezioni


In Saeptis Mamurra diu multumque uagatus,

      Hic ubi Roma suas aurea uexat opes,

Inspexit molles pueros oculisque comedit,

      Non hos quos primae prostituere casae,

5

Sed quos arcanae seruant tabulata catastae

      Et quos non populus nec mea turba uidet.

Inde satur mensas et opertos exuit orbes

      Expositumque alte pingue poposcit ebur,

Et testudineum mensus quater hexaclinon

10

      Ingemuit citro non satis esse suo.

Consuluit nares an olerent aera Corinthon,

      Culpauit statuas et, Polyclite, tuas,

Et turbata breui questus crystallina uitro

      Murrina signauit seposuitque decem.

15

Expendit ueteres calathos et si qua fuerunt

      Pocula Mentorea nobilitata manu,

Et uiridis picto gemmas numerauit in auro,

      Quidquid et a niuea grandius aure sonat.

Sardonychas ueros mensa quaesiuit in omni

20

      Et pretium magnis fecit iaspidibus.

Vndecima lassus cum iam discederet hora,

      Asse duos calices emit et ipse tulit.

19

ueros ed. Ald. Cfr. IV 61, 6; X 87, 14

uero β

uiro γ