Nec mullus nec te delectat, Baetice, turdus,
Nec lepus est umquam nec tibi gratus aper;
Nec te liba iuuant nec sectae quadra placentae,
Nec Libye mittit nec tibi Phasis aues:
5
Capparin et putri cepas allece natantis
Et pulpam dubio de petasone uoras,
Teque iuuant gerres et pelle melandrya cana,
Resinata bibis uina, Falerna fugis.
Nescio quod stomachi uitium secretius esse
10
Suspicor: ut quid enim, Baetice, σαπροφαγεῖς?