Anthologia Vossiana 24 Z (= 429 R = 427 SB)
Quod non seuera carmina scribat
Iam libet ad lusus lasciuaque furta reuerti;
Ludere, Musa, iuuat: Musa seuera, uale!
Iam mihi narretur tumidis Arethusa papillis,
Nunc astricta comas nunc resoluta comas
5
Et modo nocturno pulsans mea limina signo
Intrepidos tenebris ponere docta pedes;
Nunc, collo molles circum diffusa lacertos,
Vt flectat niueum semisupina latus
Inque modos omnes, dulces imitata tabellas,
10
Transeat et lecto pendeat illa meo
Nec pudeat quicquam, sed me quoque nequior ipso
Exultet toto non requieta toro.
Non deerit Priamum qui defleat, Hectora narret:
Ludere, Musa, iuuat: Musa seuera, uale!