Horatius carmina 3, 16

Testo base di riferimento: F. Klingner, 1959

Cura dell'edizione digitale: G. C. Musa, 2009

Altre sezioni


Inclusam Danaen turris aenea

Robustaeque fores et uigilum canum

Tristes excubiae munierant satis

Nocturnis ab adulteris,

5

Si non Acrisium uirginis abditae

Custodem pauidum Iuppiter et Venus

Risissent: fore enim tutum iter et patens

Conuerso in pretium deo.

Aurum per medios ire satellites

10

Et perrumpere amat saxa potentius

Ictu fulmineo; concidit auguris

Argiui domus ob lucrum

Demersa exitio; diffidit urbium

Portas uir Macedo et subruit aemulos

15

Reges muneribus; munera nauium

Saeuos inlaqueant duces.

Crescentem sequitur cura pecuniam

Maiorumque fames: iure perhorrui

Late conspicuum tollere uerticem,

20

Maecenas, equitum decus.

Quanto quisque sibi plura negauerit,

Ab dis plura feret: nil cupientium

Nudus castra peto et transfuga diuitum

Partis linquere gestio,

25

Contemptae dominus splendidior rei,

Quam si quidquid arat inpiger Apulus

Occultare meis dicerer horreis,

Magnas inter opes inops.

Purae riuos aquae siluaque iugerum

30

Paucorum et segetis certa fides meae

Fulgentem imperio fertilis Africae

Fallit sorte beatior.

Quamquam nec Calabrae mella ferunt apes

Nec Laestrygonia Bacchus in amphora

35

Languescit mihi nec pinguia Gallicis

Crescunt uellera pascuis,

Inportuna tamen pauperies abest

Nec, si plura uelim, tu dare deneges.

Contracto melius parua cupidine

40

Vectigalia porrigam,

Quam si Mygdoniis regnum Alyattei

Campis continuem. multa petentibus

Desunt multa: bene est cui deus obtulit

Parca quod satis est manu.

Cliccare sulle parole in blu per vedere l'apparato