Seuerus Censor Iulianus consocer
Desinite, o ueteres, Calpurnia nomina, Frugi
Vt proprium hoc uestrae gentis habere decus;
Nec solus semper censor Cato nec sibi solus
Iustus Aristides his placeant titulis.
5
Nam sapiens quicumque fuit uerumque fidemque
Qui coluit, comitem se tibi, Censor, agat.
Tu grauis et comis cum iustitiaque remissus,
Austeris doctus iungere temperiem.
Tu non ascito tibi me nec sanguine iuncto
10
Optasti nostras consociare domos.
Nempe aliqua in nobis morum simulacra tuorum
Effigies nostri praebuit ingenii;
Aut iam Fortunae sic se uertigo rotabat,
Vt pondus fatis tam bona uota darent.
15
Si quid apud manes sentis, fouet hoc tibi mentem,
Quod fieri optaras id uoluisse deum.