ICUR-02, 4107a = Mossong-2022, 00067

Innouat antiquum melior pictura decorem,

      Sanctorum meritis frons reparata nitet.

Nunc caelo est similis uere nunc inclyta Roma,

      Cuius claustra docent intus inesse deum.

5

Ianitor ante fores fixit sacraria Petrus.

      Quis neget has arces instar habere poli?

Admitti ad caelos mortalia corpora credas,

      Sub pedibus domini dum pia porta patet.

Pestes, bella, famem, insidias, casusque nefandos

10

      Erecta omnipotens arcet ab urbe manu.

Non hic fallacem lusit pictura decorem,

      Sed domini populos urbs titulata probat.

Parte alia Pauli circumdant atria muros.

      Hos inter Roma est; hic sedet ergo deus.

15

Hic oculis hominum Christi praestatur imago;

      Nam uerum sola cernere mente licet.

Regio I Latium et Campania / Località: Roma
Datazione: 498-514 d.C.

EDCS
EDB

 

Testo base di riferimento: ICUR-02, 04107a

Cura dell'edizione digitale: E. Saltelli, 2011 - A. Prontera, 2022

 

Distici elegiaci