CLE 01238 = Cholodniak 01142 = CIL 08, 11824 = CLENuovo p 122 = Courtney 1995, 00109 = D 07457 = ILTun 00528

<>

      <>

Pau[p]ere progenitus lare sum paruoq(ue) parente,

      Cuius nec census neque domus fuerat.

5

Ex quo sum genitus, ruri mea uixi colendo:

      Nec ruri pausa nec mihi semper erat.

Et cum maturas segetes produxerat annus,

      Demessor calami tunc ego primus eram.

Falcifera cum turma uirum processerat aruis,

10

      Seu Cirtae Nomados seu Iouis arua petens,

Demessor cunctos ante ibam primus in aruis

      Pos tergus linquens densa meum gremia.

Bis senas messes rabido sub sole totondi

      Ductor et ex opere postea factus eram.

15

Vndecim et turmas messorum duximus annis

      Et Numidae campos nostra manus secuit.

Hic labor et uita paruo cont(ent)a ualere

Et dominum fecere domus, et uilla paratast

      Et nullis opibus indiget ipsa domus.

20

Et nostra uita fructus percepit honorum,

      Inter conscriptos scriptus et ipse fui.

Ordinis in templo delectus ab ordine sedi

      Et de rusticulo censor et ipse fui.

Et genui et uidi iuuenes carosq(ue) nepotes.

25

Vitae pro meritis claros transegimus annos,

      Quos nullo lingua crimine laedit atrox.

Discite mortales sine crimine degere uitam:

      Sic meruit, uixit qui sine fraude, mori.